أقلام وآراء

حياتي كلها خربت، ومشاكل مع صاحباتي، زوجي، اختي، بيت حماي كله بسبب صاحبتي

يا ريتني سمعت كلام امي لما حكتلي يما الشخص الي بنقلك حكي لو بحبك ما بينحكى عنك قدامه ! 
كان ما خربت حياتي كلها ….

تالا صاحبتي من سنين، من ايام المدرسة ، بتذكر اول ما تصاحبنا كنت انا وسمية صحبة كثير، بس اجت تالا وحكتلي انها سمية بتحكي عني كلام مش منيح، واني زنخة ولزقة؛ انا وقتها زعلت من سمية وعملت معها طوشة ونجرحت منها عنجد مع انها قالتلي هالحكي كان زمان لما تقاتلت انا وياها وهلئ بتحبني بس ما صدقتها وراحت قطيعة بيني وبينها💔

ولما فتنا عالجامعة دخلنا بنفس التخصص ، كانت كل ما تشوفني مع بنات صحبة كثير، تيجي بعد فترة تحكيلي سمعتهم بحكو عنك هيك هيك، وانك بتدرسي من وراهم وبتعملي حالك مش دارسة ، وانك منافقة؛ انا يومهت عصبت عالآخر واكتئبت وصرت اعيط انه ليش فش صحبة حقيقية هالأيام، وزعلت منهم ، حتى بعد ما تخرجت وتزوجت، مرة بتذكر اجت وحكتلي كنت عند بنت حماكي قبل فترة وصارت تحكي عنك انك زنخة وثقيلة دم وشايفة حالك، وانهم ما كانوا حابينك اول ما تزوجتي، انا اتصلت على زوجي وعجبت ردح، واجا وصارت طوشة كبيرة بيني وبينه؛ وبعدها اطاوشت مع بنت حماي وصارت تحكيلي والله هالحكي زمان اول ما خطبتوا! وهسا كلنا بنحبك وبنعتبرك اختنا؛ مع هيك انا زعلت منها وشلت بقلبي عليها …

اخر شي صارا الطوشة بيني وبين اختي، بعد ما عزمتها عندي ونزلت انه بعد الاخت ما في حدا منيح ؛ خاصة اني كنت مطاوشة معها قبل فترة، اجت تاني يوم لعندي تالا وحكتلي اختك حكت عنك ايامها انك محكومة من زوجك وما عندك شخصية، وليل نهار تهتمي بحالك عالفاضي …

وقتها ما ضل براسي عقل حملت سماعة التلفون وعجبت على اختي، واختي تحكيلي انه هالحكي كان بلحظة عصبية ، وانها تالا كانت بتحكي عني وقتها، وحاكية لاختي اني حاكية عنها انها ولادها معفنين ومفجوعين لهيك اختي حكت هالحكي … 
انا جد تضايقت وقلبي صار يوجعني واجت لعندي امي زيارة وبتذكر لما حكتلي يما لو هالبنت صاحبة حقيقية لالك وبتحبك ما بنحكى عنك بالسوء قدامها، لو ما هي بتحكي عنك ….

وبعدها اقتنعت من كلامها وتذكرت كل المشاكل وكيف صفيت لحالي وقلبي حاقد على نص الناس، طلبت منها ما توصلي حكي نهائي وبطلت احكي قدامها شي….
الي بحبك فعليا ما رح يجي يحكيلك كلام يزعلك ويجرحك ، وينقلك حكي مش منيح عنك، وفي عبارة اذا حدا رماني بسهم وما اجا علي ليش انت تيجي وتغرزوا بقلبي، وهالشي بنطبق على نقل الحكي، كلنا بلحظة غضب بنحكي وبنسب وبنخبص، وهالحكي اذا وصل لحدا ثاني رح يعمل مشاكل كثيرة، لهيك لا تسمحوا لحدا ينقلكم حكي، ولما يجي حدا يحكيلكم فلان حكى عنك، احكيلوا ما تحكيلي مش مهتم كثير ولونك ما حكيت عني ما تجرأ الشخص ليحكي عني 💔

تسمحوش لحدا يخرب حياتكم والفتنة اشد من القتل تخلوش الناس الفسادة يملو قلوبكم حقد ، ويا ريت تبطلوا عادة نقل الكلام السيء وتصيروا تنقلوا الكلام المنيح

#هديل_قاسم

بالفيديو | "ماما ماتت برصاصة..ماما مارح ترجع".. كلمات خرجت من فاهي طفلين فقدا والدتهما