أقلام وآراء

كنت بالعرس لما أجت بنت وحكتلي اعطيني رقم أمك عشان نيجي نخطبك!! ووافقت … وهذا ما حصل !!!

كنت بالعرس لما أجت بنت وحكتلي اعطيني رقم أمك عشان نيجي نخطبك!

،وافقت واعطيتها الرقم، كنت بالتوجيهي، وقتها، اهلي بالبداية ما وافقوا بس بعد ما سألو عنه وعرفوا انه متعلم ومحترم ومكون حاله وافقوا ….

انا كنت أمر بأزمة نفسية كبيرة، أعز صاحبة عندي بطلت تحكي معي ، وامي وابوي دائما مشاكل وخواتي مش فاضيات لقصصي ! حكيت براسي هاد الي رح يطلعني من كل هالنكد، وبنفس الوقت استشرت كل الناس الي حوالي لانه اكبر مني ب14 سنة! 

وكلهم حكولي عادي هيك بدللك وبتضلي بنظره صغيرة!

فاتصلو علينا وحكينالهم تفضلو عنا، يوم ما اجت امه واخته ما حبيت كيف كانوا يطلعو علي وكأني قطعة اثاث بكل التفاصيل وبسألو عن شعري وكل شي ! بس عجبتهم وبعد 4 أيام ااجا الشب مع اهله وقعدنا واتفقنا ، بس انا وقتها حكتله اني بدي اكمل تعليمي !

صار يحكيلي اه بخليكي تكملي وبشجعك كمان

أول الخطبة كانت حلوة ، هدايا وطلعات، وزيارات وكنت مبسوطة ، بس بعد بشهر صرت احس بشي غريب بطلت مبسوطة؛ في فرق كبير بطريقة التفكير بينا، وكمان فرق العمر مشكلة بس حكيت معلش بكرا بتعود علي مع الوقت، مرو 3 شهور وانا مش شاعرة باتجاهه بالحب صرت اخاف لانه عندي صاحبات تزوجن حدا ما بحبينو ولليوم في مشاكل بينهم، بس اهلي حكولي مع الوقت رح تحبي، وبعد 5 شهور خطبة كان وقتها امتحانات التوجيهي، صار يحكيلي خلص لا تروحي عالامتحانات انسيكي من التعليم، بكرا بنتزوج وما بتفضي، وانا رح اعيشك مثل الملكات، كانوا كل بنات صفي يروحوا عالامتحانات وانا بالبيت مثل الحزينة، كنت اصير اعيط لما اشوفهم مروحيين من الامتحان، بعدها صارت غيرته لا تطاق؛ ممنوع اطلع مع اهلي، ممنوع اشوف ولاد خالتي، ممنوع احكي مع ابصر مين، بلشت انخنق وانضغط، صرت اكرهه، وكل كلامنا طوش ومشاكل؛ واهلي واقفين معه، قلتلهم انه مش منيح! ما صدقوني … 

ضليت معه، لمرة طلعنا على محل نشتري اواعي، يومها اختلفنا عشغلة صار يصرخ علي قدام الكل وحسيت بالاهانة، انا وقتها خجلت وقلتله مشان الله اهدا بس عشان الناس !

ضل لاحقني ويصرخ ورفعت صوتي علي لانه الناس التمو علينا؛ رفع ايده وضربني كف !

وقتها انجن جنوني لانه قدام اهله واهلي؛ روحت عالبيت وحكيت لابوي شو صار ، ابوي وقتها اتصل عليهم وحكالهم فش نصيب وكل شي انتهى

انا حاليا رجعت عالمدرسة اكمل تعليمي من اول وجديد، وبدرس وشاطرة كثير؛ مبسوطة من حالي لأنه شخصيتي تغيرت كثير بعد هالتجربة، وانا خاطبته كنت خايفة احلم احلام بسيطو حتى، اليوم صرت احلم اكمل جامعة واتفوق واشتغل، تعلمت انه السعادة مش خطيب وبس، السعادةة انه الاقي حدا يلائم أحلامي وطموحي

مش اتخلى عن احلامي واعيش بحلم زوجي او خطيبي

، فخورة ومبسوطة اني قدرت اطلع من هالازمة الي عشتها بغض النظر عن حكي الناس الي ما برحم لما فسخنا الخطبة والاشاعات الي طلعوها علي بس ولا اعيش مع حددا بدون كرامة ومش محترمني!

تجربة الخطبة مش ندمانة عليها، هي بالنهاية قرار اخدتو وكان غلط ومش مناسب، عارفة انه رح اخطب حدا بيحترمني، ونكمل احلامنا انا ويا سوا، بس بعد ما اصير واعيةاكثر!

نصيحة لكل بنت، لا تستعجلي عالخطبة عشان تحطي انك خطبتي وتقاهري صاحباتك مثل ما كنت افكر ، الحياة اكبر بكثير من هيك ، عيشي كل مراحل حياتك، انبسطي اطلعي اتعلمي ، اذا انتي خاطبة وخطيبك بهينك وما بتحبي لا تتنازلي وتضلي معه عشان خايفة من حكي الناس؛ وانه بكرا بتغير وبتحبي !

قلبك اله عليكي حق، والمنيح منيح والعاطل عاطل وببين ! … اعرفي انه في كثير قصص زواج كتير حلوة وازواج بحترموا نسوانهم وبساعدوهم لينجحن، دوري على هيك شريك …

القصة حقيقية وبعرف نزلت بتشبهها بسس البنت طلبت مني انزلها وما حبيت افشلها 😍😍

#هديل_قاسم

ثلوج وامطار قادمة الى فلسطين ... التوقعات الموسمية للموسم الجديد 2018/2017