انا بنت حياتها بتخزي… من كم سنة عملت حساب عالفيسبوك. ومن يومها خربت حياتي،

أقلام وآراء
 
 

نابلس الاخباري

انا بنت حياتها بتخزي … من كم سنة عملت حساب عالفيسبوك. ومن يومها خربت حياتي، اولها كان الوضع عادي، بس من سنتين وانا اشوف شو الناس بعملوا ، عندي صاحبات ليل نهار طالعات، وانا لحالي بالبيت …

ما في مكان ما بعملوا في شيك ان، غير هيك كل يوم والثاني بتخطب بنت !

وصلت مرحلة بدي الغي الفيسبوك، لانه عملي حالة اكتئاب، كل الناس مبسوطين مرتاحين …

بس وقتها انا خطبت، وصرت كل يوم انزل هاف فن وذ خطيبي احلى حبيبي….

بس هو ما كان يعبرني وينزل بوستات مثل خطيب صاحبتي ، صرت اعمل معه مشاكل عالطالعة والنازلة؛ واحكيله انه مش رومانسي .. ويشوف البنات الخاطبات شو بيجيهن هدايا …
وقلبت حياتنا كلها مشاكل….

فيومها اجا وحكالي الغي الفيسبوك ورح تنحل مشاكلنا، فقررت الغي، طلعتلي شغلة السناب شات والانستغرام، هاد لسا اسخم من الفيسبوك …
كانوا عندي بنات ليل نهار طالعين ..ويضحكوا ويغنو ويرقصوا وانا بهالبيت ما بعمل شي …

وحتى لما تزوجت، صرت اعمل مشاكل لزوجي ليش ما بهتم فيي، ليش ما بنسافر، وليش وليش ما عندي بيت حلو مثل صاحبتي،…
وكل مرة اسب عحظي … واحسدهن على حياتهن الحلوة ….
بيوم من الأيام شفت بنت عندي كاتبة انه اطلقت!

هاي نفسها الي ليل نهار كانت تنزل عالفيسبوك تشيك ان مع زوجها، ونفسها الي عالسناب شات ليل نهار مبسوطة وتضحك وجوزها بعملها مفاجآت …
الكل انصدم من الخبر، انا رحت اسألها طيب ليش؟

انحسدتو يعني؟
حكتلي ، ما كنت مبسوطة معه، كان كاتم عنفسي، ما بحترمني
طيب والمفاجات والمطاعم … ما عوضوكي؟

حكتلي السعادة شي من جوا من الناس الي بنتعامل معهم ، الاحترام والحب اهم من هالشغلات كلها ةصارت تبكي …
انا تذكرت زوجي الي ليل نهار يشتغل لحتى يأمن مصروف البيت، الي بحبني وبخاف علي بدون ما يحكي، صحيح ما بسفرني ولا بكتبلي عالفيسبوك، بس بحترمني ومش مقصر فيي …
عرفت انه انا ضيعت سنين من عمري وانا اراقب بغيري، واخرب على حياتي وحالي وانكد عالناس الي حوالي ، ونسيت حياتي؛ ونسيت انبسط بالشغلات الي عندي ..
وعنجد من راقب الناس مات هما … ومش كل شي بنشوفوا هو حقيقة هالناس … يمكن احنا مبسوطين اكثر منهم .. لهيك ما تحسدوا حدا عسعادته الظاهرة.. وانتوا لا تخربوا حياتكم بسعادة مزيفة او حقيقة وغيركم بحسدكم عليها ….

ارضوا بالمكتوب كل شخص عنده طريقته للتعبير عن الحب، زوجك الي شايفتي مش رومانسي ، هو بتعب وبموت لحتى يأمنلك حياة تعيشي فيها بكرامتك واحترامك
#هديل_قاسم