انا وسامي بنحب بعض من سنتين، وكنا نستنى اخلص توجيهي عشان نتزوج !

أقلام وآراء
 
 

وفعلا انا بالتوجيهي درست منييح كتييير ونجحت بمعدل عالي، كنت مبسوطة رح اخطب وافوت الجامعة ، وهيك حياتي بتصير حلوة ….
بس سامي كان من شروطه انه ما اكمل جامعة، قلتله انه انا حابة ادرس وما رح اقصر في، بس عالفاضي ما وافق؛ وانا لإني بحبه تنازلت …..
هو منيح كتير ومحترم ووضعه المادي عادي، خطبنا، اولها مثل اي ثنين كنا طايرين ببعض، بعدها صار في مشاكل بينا، اشياء تافهة تولع مشكلة كبيرة، وبكل مشكلة اخاف احكي لاهلي، لاني غصب عنهم خطبت وطلعت من الجامعة 
مع انه ابوي رفض الفكرة بالبداية وحكالي لازم تتعلمي!
خطبتنا كانت سنة وبعدها تزوجنا….
اول شهر زواج كان كل شي بجنن، جد كنت طايرة في وشايفته قد الدنيا؛ حسيت اني كسبت شي بحياتي ما رح اكسبه وانه ما ضيعت عحالي حب حياتي …
بعد بشهر سامي صار يطلع على الشغل بكير واضل انا بالبيت ، اشتغل شغل البيت واقضي النهار احكي مع امي وخواتي، بس صار في روتين بحياتي، ملل كثير …

اقعد احكي يا الله لوني بدرس كان بلتهي بالدراسة، بس حماتي كانت تحكيلي لا خلفي ولد بتلتهي في ، كنت كل ما اطلع واشوف بنات الجامعة مروحات تنزل دمعتي، احس اني ضيعت شي مهم بحياتي، بس اتذكر سامي وحنيته وحبه اتغاضى عن هالشي واحكي هيك احسن …. 
مرت الايام وحملت بأول بنت، وانا حامل صار في مشاكل مع سامي بالشغل وطلع منه، وصار دائما يتفشش فيي عالطالعة والنازلة وانا اتحمل واحكي معلش …

بس لما دخلوا دار حماي بالموضوع، خربوا الدنيا عالطالعة والنازلة خلي مرتك تخفف مصاريف مع انه بصرفش شي فعليا، وهي مش حاسة فيك ومراقبيني عالحركة، بس ولدت البنت، حماتي زعلت بزيادة لانها بنت والتحريض زاد علي …
بعد 5 سنين زواج 
وهيك بدون مقدمات حملت غراضي ورحت عند دار اهلي، ما كنت مسترجية افتح سيرة الطلاق ، بس حكتلهم بدي ارتاح هالفترة … 
هالفترة لي.بعدت فيها بلشت اتذكر التنازلات الي تنازلتها عشان سامي، انا كنت متفوقة بمدرستي كان فيي اتفوق بالجامعة، كان انا متل بنت عمتي حاليا بشتغل بشركة ةشايفتها كل يوم بكوفي شوب وعايشة حياتها؟ حتى كان شخصيتي اقوى، كان كمان لو درست واشتغلت كان ساعدت زوجي بالمصاريف لما طلع من شغله، كان نا صارةا هالمشاكل، صفيت بين الحيطان انا وبنتي ، وشي طبيعي رجعت لزوجي رغم كل المشاكل لاني مليش غيره!
بس قررت ابلش من جديد، وادخل جامعة، زوجي رفض بالبداية، بس مع الزن وافق وبشروط تعجيزية !بس هو حس فعليا انه لو انا تعلمت وشتغلت حساعدوا كتير وخاصة مصاريف الحياة كثيرة
فتت الجامعة بس حسيت شي ناقصني، كان وراي مسؤوليات كتيرة بنتي وزوجي وقرايبه وقرايبي،، حسيت اني نهلكت وتركت وما قدرت اكمل ..

لليوم ندمانة لي ما عشت حياتي خطوة بخطوة وعشو كنت مستعجلة !
نصيحة يا بنات الزواج استقرار وحلوو بس الشهادة سلاحك بهالدنيا ، مرحلة المدرسة حلوة الجامعة حلوة الشغل حلو … عيشوا حياتكم خطوة بخطوة واخرتكم حتتزوجوا وتنبسطوا مع جيزانكم بس وانتو واعيين على هالدنيا، ويمكن مرتك تسندك لما توقع، اذا كانت بتشتغل ، مش سلاحها لحالها العلم، وسلاح لالك !

#هديل_قاسم