أقلام وآراء

بعد خطبتي بسنة وقبل عرسنا بشوي ، وقعت عالأرض ونقلوني عالمستشفى، صحيت لقيت امي ماسكة ايدي ووجهها ما بتفسر!!

بعد خطبتي بسنة وقبل عرسنا بشوي ، وقعت عالأرض ونقلوني عللمستشفى، صحيت لقيت امي ماسكة ايدي ووجهها ما بتفسر، سألتها شو في ؟

نابلس الاخباري – اقلام و اراء – الكاتبة هديل القاسم

قالتلي : خير يما خير ودمعة نزلت من عيونها على ايدي
قضيتها فترة بالمستشفى على فحوصات وخزع، وعياط امي اللي مش قادرة افسره، وانا شاكة انه معي اشي ومخبيين علي
لأجت اللحظة اللي خبروني فيها انه معي لوكيميا –

وقتها ما عرفت شو احكي، كان شعوري غريب، قلتلهم متحكوش لحمزة الي هو خطيبي
بخاف ما يتحمل هللخبر

كنت طول الفترة هاي لحد ما بدي ابلش جلسات العلاج خايفة علي ، هاد حب حياتي انا ويا من زمان مع بعض وأجت اللحظة الي لازم اصارحه فيها

طلعنا عكوفي شوب وقعدت احكي واعيط
يحكيلي شو في؟

احكيله لو متت بتزعل علي
يحكيلي بلا هبلك بعيد الشر….
قلتله : انا معي لوكيميا
هو ضحك وقلي بلا هبلك

طلعت الفحوصات وورجيته ياهم
تغيرت كل ملامح وجهه، بطلت قادرة افهمه ، صار يحكي حكي مخربط
توقعت يواسيني ، بس ضل ساكت من الصدمة
بأول جلسة طلبت يكون معي قلي ما بتحمل اشوفك بتتعذبي

قلتله بس بديش اكون وحيدة
قلي بقدرش يعني بقدرش
خلصت الجلسة ونمت طول اليوم من التعب

صحيت ما لقيت ولاًمسج منه- اتصلتله حكالي اطمنت عليكي من امك ما حبيت ازعجك وسكر الخط بحجة مشغول
بس بلشت اخسر شعري، صار يبعد اكثر، كانت حالتي بتسوء لانه نفسيتي متل العمى ، مع هيك كنت بحكي اكيد بسبب مرضي وخوفو علي

لحد ما اجا اليوم الللي اكتشفته في، قلي سامحيني ما بقدر اكمل معك
بقدرش اتحمل هالوجع، مفهمتش شو حكى ومركزتش لانه وقعت كمان مرة ونقلوني عالمستشفى، وكنت طول الليل ابكي واحكي يا رب ليش خليتني وحيدة بمرضي !

وادعي ربنا ياخدني ويريحني، بس بعد مدة شفت بنت صغيرة معها المرض نفسه، كيف كانت تقاوم وتضحك، رغم انها يتيمة وملهاش حد…
سألتها كيف قادرة هيك ؟
قالتلي شغلة غيرت حياتي

انا واثقة بربنا انه رح يشفيني ويرجعلي شعري والعب مثل الثانين ….
بعدها فتت غرفتي وكملتها عياط؛ انا ليش بستنى من حد يوقف معي؛ ليش زعلت عشان خطيبي تركني، لازم اهزم المرض عشان احلامي الي لسا ما حققتها ….

الحمد لله بعد فترة تعافيت تماما من هالمرض، وكملت مشروعي في اعطاء دورات ودروس كيف تكون شخص قوي وتحارب الناس اللي بخلوك تموت اكثر من المرض نفسه ..
صرت وين ما اروح اكون قصة نجاح وملهمة للناس الي حوالي …

واكتشتفت السعادة الحقيقة بتنبع من الشخص نفسه، واللي بتركك بظروفك الصعبة هو امتحان من ربنا لصبرك، وكمان بكشفك الضرر الي رح يصيبك من هالشخص، لو لللي كنت مفكره حب حياتي وسندي ضل معي، كان انا اليوم ما قدرت احكيلكم قصتي، ولا حتى اكون عايشة

كان متت اكيد من قهري وحاجتي لسنده!
اعرف انه السند الوحيد المستحيل يخذلك هو نفسك، والرزق انواع ، في ناس رزقها مصاري؛ رزقها زوج صالح، وناس رزقها مرض يكشفلها كل الناس السيئين اللي حواليهم ، ويخليهم ينجحوا اكثر واكثر
لما بدك تدخلي اي علاقة فكري كثير يا ترى اول ما شكلي يبلش يتغير، وأنصح، ووجهي يتملى حبوب ويكت شعري رح يضل معاي !

-